Кангрэс ЗША прыняў рэзалюцыю з заклікам даць Украіне смяротную зброю

24.03 09:47

23 сакавіка палата прадстаўнікоў Кангрэсу ЗША прыняла рэзалюцыю, якая заклікае прэзідэнта Барака Абаму прадаставіць Украіне смяротнае абарончае ўзбраенне.

Рэзалюцыю падтрымалі 348 кангрэсменаў, супраць выступілі 48 заканадаўцаў, гаворыцца на сайце палаты прадстаўнікоў.

У дакуменце кангрэсмены абедзвюх партый ЗША заклікаюць Абаму аказаць Украіне ваенную дапамогу, каб яна магла абараніць свой суверэнітэт і тэрытарыяльную цэласнасць.

Аўтары дакумента сцвярджаюць, што існаванне незалежнай, дэмакратычнай і квітнеючай Украіны знаходзіцца ў нацыянальных інтарэсах Злучаных Штатаў Амерыкі.

Пры гэтым у дакуменце адзначаецца, што Расійская Федэрацыя пад кіраўніцтвам Уладзіміра Пуціна з дапамогай палітычнай, эканамічнай і ваеннай агрэсіі спрабуе падарваць незалежнасць Украіны і парушае тэрытарыяльную цэласнасць краіны.

Кангрэсмены адзначаюць, што расійская агрэсія ўключае ў сябе незаконную анексію Крыма, стварэнне і кантроль сепаратысцкіх груповак у іншых абласцях Украіны, уключаючы пастаўкі ім смяротнага ўзбраення.