Улада ў Беларусі не гатовая да правядзення свабодных дэмакратычных выбараў, лічыць намеснік старшыні БСДП (Грамада)

04.01 10:30

У сапраўдны момант няма ніякіх сігналаў аб тым, што абвешчаныя выбары ў мясцовыя саветы праходзяць свабодна і дэмакратычна, заявіў БелаПАН першы намеснік старшыні Беларускай сацыял-дэмакратычнай партыі (Грамада) Ігар Барысаў.

 

"Калі людзей ад апазіцыі не ўключаюць у камісіі, гэта сведчыць аб тым, што выбары праходзяць без удзелу зацікаўленых бакоў", — сказаў палітык.

 

Нагадаем, Магілёўскі аблвыканкам і прэзідыум Магілёўскага аблсавета дэпутатаў уключылі ў склад абласной камісіі па выбарах дэпутатаў мясцовых саветаў двух прадстаўнікоў праўладных палітычных партый — Камуністычнай партыі Беларусі (КПБ) і Рэспубліканскай партыі працы і справядлівасці (РППС). Сябры АГП, Беларускай партыі левых "Справядлівы свет", Ліберальна-дэмакратычнай партыі, накіраваныя сваімі партыйнымі арганізацыямі, у камісію не патрапілі. Магілёўскія гарадскія ўлады таксама адмовіліся ўключыць у склад гарадскога выбаркама члена АГП. У сваю чаргу ў склад акруговых камісій увайшлі ўсе дэлегаваныя туды прадстаўнікі КПБ і РППС — 14 чалавек. З 11 вылучаных прадстаўнікоў АГП членам акруговай камісіі стаў толькі адзін чалавек, а ад "Справядлівага свету" і Беларускай сацыял-дэмакратычнай партыі (Грамада), якія вылучылі па чатыры прадстаўнікі, не быў уключаны ніхто.

 

Нягледзячы на масавае неўключэнне ў склад выбаркамаў прадстаўнікоў апазіцыі, БСДП (Грамада) мае намер вылучыць кандыдатамі ў дэпутаты каля 50 сваіх сябраў па ўсёй краіне, частка з іх таксама будзе вылучацца шляхам збору подпісаў. "Мы ні з кім каардынаваць працу не будзем, бо ўсе разумеюць, што выбараў няма, таму няма ніякага адзінага спісу кандыдатаў. Кожная палітычная сіла, якая ідзе на гэтыя выбары, мае выключна свае арганізацыйныя мэты — унутраную мабілізацыю кандыдатаў, працу з выбаршчыкамі, данясенне партыйнага меседжа да мэтавых груп", — сказаў прадстаўнік кіраўніцтва апазіцыйнай партыі, адзначыўшы, што нават згадванне партыйнасці кандыдата ў бюлетэнях з'яўляецца рэкламай палітычнай арганізацыі.

 

Ігар Барысаў не выключае, што ў некаторых саветах пасля гэтых выбараў з'явяцца адзін-два прадстаўнікі дэмакратычнай апазіцыі, аднак гэта, на яго думку, "ніяк не зменіць сітуацыю з дэмакратыяй у Беларусі". "Выбары не будуць дэмакратычнымі. Але нават калі некалькі дэмакратаў атрымаюць дэпутацкія мандаты, то гэта ўсё роўна не дасць ім вялікіх паўнамоцтваў, вялікага ўплыву ў тых саветах, куды яны пройдуць. Вопыт Анісім і Канапацкай паказвае, што яны ў такой колькасці ўнутры парламента абсалютна бескарысныя, за выключэннем некаторых нюансаў. Так, яны могуць распавядаць пра ўнутранае жыццё Палаты прадстаўнікоў, колькі зарабляюць, чым жывуць і гэтак далей. Гэтыя рэчы раней не былі вядомыя шырокай публіцы. Цяпер яны робяцца вядомымі, але казаць, што яны зрабілі там нейкі фурор або рэвалюцыю, абсалютна немагчыма. А гледзячы на працэсы, якія адбываюцца ў АГП, ад якой Канапацкая стала дэпутатам, бачыш, што кіраўніцтва партыі спарадзіла сабе альтэрнатыву, і чалавек фактычна ўжо пачаў сваю самастойную гульню, стварыўшы аб'яднанне "Наперад, Беларусь", — сказаў Барысаў.

 

Ён лічыць, што ўлады не гатовыя да правядзення сумленных, дэмакратычных выбараў. "Я ведаю два выпадкі, як у Магілёве і ў Бабруйску прадстаўнікі ўлады сустракаліся з людзьмі і прапаноўвалі ім гэтыя мандаты. Было два патрабаванні. Першае — не крытыкаваць Лукашэнку публічна, другое — не адмаўляцца ад мандату. Гэта яскрава сведчыць пра тое, што ўлада не гатовая праводзіць свабодныя дэмакратычныя выбары. 

 

Бо, калі б яна была гатова іх правесці, яна б не таргавалася на такім узроўні. І гэта кажа пра тое, што, даючы мандаты, улада ўсё роўна хацела б кантраляваць гэтых людзей, што цалкам супярэчыць дэмакратычнай прыродзе і дэмакратычнай культуры", — заявіў першы намеснік старшыні БСДП (Грамада).